२०७६-२-६ , सोमबार


पाटन उच्च अदालतका मुख्यन्यायाधीश चोख्खै ?

श्रीमान सम्पादकज्यू

उच्च अदालत बिराटनगरका मुख्य न्यायाधीश डा. कुलरत्न भूर्तेलसहित ७ न्यायाधीश ३३ किलो सुन तस्करी र सनम शाक्य हत्या प्रकरणमा जिल्ला अदालत मोरङको थुनछेक आदेश उल्ट्याउँदै छाडेको आरोपमा तानिए । सुरुमा नागेन्द्र लाभ कर्ण, थीरबहादुर कार्की, उमेशकुमार सिंह, उमेशराज पौडेल र सारंगा सुवेदीसहित ५ न्यायाधीश तानिए । त्यसपछि साँघु साप्ताहिकले नै सुनकाण्डका आरोपी छाड्न एकै लगाउका मुद्दा छरेर पेशी तोक्ने मुख्य न्यायाधीश भूर्तेल र पाँच न्यायाधीशकै जस्तो आरोपीलाई छाड्ने साधुराम सापकोटा र जनक पाण्डेलाई नतानिएकोबारेमा समाचार प्रकाशित ग¥यो । साँघुमा समाचार प्रकाशित भएकै दिन मुख्यन्यायाधीश भूर्तेल तानिए । त्यसपछि क्रमशः न्यायाधीशद्वय जनक पाण्डे र साधुराम सापकोटा पनि तानिएका थिए । 

 


त्यस्तै, नेपाल इन्जीनीयरिङ कलेजका संचालक डा. लम्बोदर न्यौपानेलगायतले डेढ अर्ब सम्पत्ति कब्जा गर्नका लागि खारेज भएको प्रालि ब्यूँताउन उच्च अदालत पाटनमा मुद्दा दिए । बिचौलिया एक चर्चित ठेकेदारले उक्त मुद्दा जिताउने जिम्मा पाए । ती ठेकेदारले उच्च अदालतका मुख्य न्यायाधीश प्रकाश ढुंगानासँग कनेक्सन मिलाएर न्यायाधीशद्वय रेवन्त कुँवर र अग्निप्रसाद थपलियाकोमा पेशी तोकिदिए । बिचौलियाले न्यायाधीश कुँवरसँग सेटिङ गरिसकेका थिए ।

 

सामाजिक संस्थाको रुपमा गैरनाफामूलक कलेज हत्याउने लम्बोदर न्यौपानेकै पक्षमा अन्तरिम आदेश उच्च अदालतले दियो । खारेज भइसकेको प्रालि ब्यूँताउने पक्षमा अन्तरिम आदेश दिने न्यायाधीश कुँवर र पेशी तोक्ने मुख्य न्यायाधीश ढुंगाना अहिलेसम्म पनि तानिएका छैनन् । राजनारायण पाठकले उजुरी तामेलीमा हाल्न नसकेपछि कलेजका संचालकहरू अदालतबाट खारेज भएको प्रालि ब्यूँताउनका लागि करोडौंको थैली बोकेर बिचौलियामार्फत् उच्च अदालतमा पुगेका थिए । उच्च अदालत र सर्वोच्च दुवैतिर मिलाउने जिम्मा पाएका ठेकेदारले उच्चबाट अन्तरिम आदेश पाए पनि सर्वोच्चले २०७५ माघ दोस्रोसाता उक्त अन्तरिम आदेश कार्यान्वयन नगर्न आदेश दिएको छ ।

 

सर्वोच्च अदालतबाट ओमप्रकाश मिश्र प्रधानन्यायाधीश भएको बेला प्रालि ब्यूँताउने पक्षमा आदेश गराउन खोज्दा महान्यायाधीवक्ताको कार्यालयले चलखेल बुझेर मुद्दा नै सारेका कारण बिचौलियाको योजना तुहिन पुगेको थियो । तत्कालीन प्रधानन्यायाधीश मिश्रले उक्त मुद्दा आफ्नै पालामा आदेश गराउने धेरै बल गरेका थिए ।

 

मिश्रको अवकाशपछि सुनकाण्डदेखि विभिन्न काण्डमा न्यायाधीशहरू तानिन थालेपछि नेपाल इन्जीनीयरिङ कलेज हत्याउने न्यौपाने समूहको प्रालि ब्यूँताउने योजनामा तुषारापात हुँदै गएको छ । यही बेला अख्तियार दुरुपयोग अनुसन्धान आयोगका आयुक्त राजनारायण पाठकले नेपाल इन्जीनीयरिङ कलेजको प्रालि ब्यूँताउने निर्णय र डेढ अर्ब सम्पत्ति कब्जा गर्ने उद्देश्यले ७८ लाख रुपैयाँ घुस दिएको भिडियो सार्वजनिक भयो ।
                                                                                                                                      – दर्शना रिमाल, सामाखुसी, काठमाडौं ।   
 


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal