२०७५-११-५ , आइतबार


१९ अर्बको ठेक्कामा सञ्चार मन्त्रीको ठाडो  निर्देशन : एक वर्षभित्र एनटीसीको फोर जी सेवा पुग्ला त नेपालभर ?

साँघुन्यूज डटकम संवाददाता 

काठमाडौं, २९ माघ : २०७४  कार्तिकमा नेपाल टेलिकमले आफ्नो सेवालाई आधुनिक प्रविधियुक्त बनाउंदै थप विस्तारित र प्रतिस्पर्धी बनाउनका लागि फोरजीको  ३ छुट्टाछुट्टै प्याकेजसहित बोलपत्र आह्वान गरेको थियो । यसका लागि कोर नेटवर्क अर्थात् फोर जी प्रणाली जडान गर्नका लागि २ चिनियाँ कम्पनी हुवावे  र जेडटीई कर्पाेरेसन तथा सिंगापुरको माभेनिर एण्ड सिटिएस आई  हंकंग(चाइना)ले बोलपत्र दर्ता गरेका थिए । 

 

देशैभरि फोर जी सेवा विस्तारका लागि नेपाल टेलिकमले लगानी गर्न लागेको करीब १९ अर्ब रकममाथि चलखेल भएको भन्दै सन् २०१८ जनवरीदेखि झण्डै ९ महिनासम्म अख्तियार दुरुपयोग अनुसन्धान आयोगमा मुद्दा परेर छानबिन  चल्यो ।  छानबिनपछि अख्तियारले  क्लिन चिट दिएसँगै नेपाल टेलिकमलाई फोर जी सेवा विस्तार गर्ने बाटो खुलेको थियो ।

 

सुरुमा यो सेवा विस्तारका लागि २६ महिनाको अवधि तोकिएपनि सञ्चार तथा सूचना प्रविधि मन्त्री गोकुलप्रसाद बाँस्कोटाले १ वर्षभित्र काम सक्ने  गरी काम गर्न निर्देशन दिएपछि सन्  २०१९  फेब्रुअरी ३ मा टेलिकमले फोर–जी सेवा विस्तार गर्न दुई चिनियाँ कम्पनी सिसिएसआई र जेडटिईसँग ठेक्का सम्झौता गरेको छ।  यो योजना  तोकिएको समयसीमामा काम पूरा नभएमा सम्बन्धित कम्पनीले हर्जना रकम तिर्ने कडा व्यवस्था पनि गरिएको टेलिकम स्रोत बताउछ । 

 

विस्तार गर्ने भनिएको फोर जी सेवा इलामदेखि डडेल्धुरासम्म १८ सय मेगाहर्जमा विस्तारित हुने बताइएको छ । यो सेवा अत्याधुनिक र उत्कृष्ट भएको नेपाल टेलिकम स्रोत बताउँदै आएको छ । यसका साथै निजीस्तरको एनसेलले गरेको रु. ६ अर्बको लगानीसँग नेपाल टेलिकमको लगानीलाई दाँज्नै  नमिल्ने पनि बताइएको छ । ६ अर्ब खर्च गरेर  एनसेलले  अहिले २१ जिल्लामा फोर जी सेवा दिँदैं आएको छ ।

 

नेपाल टेलिकमको यो फोर जी सेवाले पाइलट प्रोजेक्ट अर्थात् फाइभ जी बराबरको सेवा दिने नेपाल टेलिकमले दाबी गरेको छ । यसका लागि विभिन्न ४ शहरका ४ साइडमा टेलिकमले पाइलट प्रोजेक्टको ट्रायल पनि गर्ने भएको छ । 

 

सञ्चारमन्त्री बाँस्कोटाले ठेक्का सम्झौता भएको दिनबाट ७७ रै जिल्लामा एक  वर्षभित्र फोर जी सेवा चालु गर्न  निर्देशन दिइसकेको अवस्थामा तोकिएकै समयमा काम सम्पन्न  गर्नु पर्ने बाध्यता पनि ठेकेदार कम्पनीलाई छ  । अहिले नेपाल टेलिकमले काठमाडौं र पोखराका ६ लाख ९२ हजार बढीलाई फोर जी सेवा उपलब्ध गराउँदै आएको छ ।

 

यदि तोकिएकै समय अवधिमा नै फोर जी सेवा विस्तार र चालु भएमा  नेपाल टेलिकमले गुमाउँदै आएको बजार हिस्सा पनि प्राप्त गर्ने अपेक्षा  गरिएको छ । विसं २०७५ मा इन्टरनेटको बजार हिस्सा हेर्ने हो भने नेपाल टेलिकमले ३९.९८ प्रतिशत ओगट्दा एनसेलले ४४.११ प्रतिशत ओगटेको छ । 

 

अब विस्तारित हुने फोर जी सेवाले नेपाल टेलिकमलाई एनसेलको बराबर टक्करको रुपमा लिने अनुमान पनि गरिएको छ । धेरैले नेपाल टेलिकमको फोर जी सेवाको प्रविधिमा नै समस्या रहेको भनेर गुनासो प्रति  टेलिकम भने आफ्नो सेवा र प्रविधि चुस्त र स्तरीय रहेको दाबी गर्दै आएको छ । र यसका लागि भने झण्डै १ वर्ष कुर्नुको विकल्प छैन ।


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal